San Lorenzo Ruiz de Manila Parish

 Pleasant Hill Subdivision, City of San Jose del Monte, Bulacan, Philippines       Tel. No.:  044-7690585

Church Talk Post New Entry

Sandosenang Pasasalamat Kay San Lorenzong Dakila

Posted by Emily G. Sequeira on September 24, 2013 at 5:40 AM



Patungo na ang bagyong Odette palabas ng bansa ngunit nag-iwan pa rin ito ng pabugso-bugsong ulan at malakas na ihip ng hangin sa huling araw ng Sambuklod Festival. Ang madilim na papawirin at ang malamig na dampi ng hangin ay hindi naging hadlang sa pagpapatuloy ng pinakahihintay taun-taon na Street Dancing competition sa aming parokya.


"Rain or shine!" ang malakas na pag-anunsyo ni Fr. Mar Ladra na tila baga sinasabing walang makahahadlang sa aming nakagawiang pagdiriwang at pasasalamat. “Ang ulan ay simbolo ng napakaraming biyayang ibinubuhos sa atin ng Diyos sa tulong at panalangin ni San Lorenzo na dapat nating lubos na pasalamatan.” wika pa niya. Ang taos-pusong pakikiisa at ang nag-aalab na sigasig naman ng bawat kalahok ay nagbigay-init sa malamya at malamig na lagay ng panahon.


Nagsipaghanda na ang lahat para sa pinaka-finale ng kapistahan pagkatapos ng misa na pinangunahan ng Kgg. na Opispo ng Malolos, Jose Oliveros, DD. Naghanda na rin ako at ang aking anak na si Jonalee upang tupdin ang naiatas sa amin. Suot ang aming cardigan, bitbit ang payong at kamera sinuong namin tulad ng karamihan ang buhos ng ulan upang makiisa, makilahok at makunan ng mga larawan ang buong kaganapan.


Sa pagkakataong ito, hindi ko mapigilang magbalik-tanaw, isang dekada at dalawang taon na ang nakararaan. Taong 2001 ng unang inilunsad ang Sambuklod Festival na may layuning pagbuklurin ang mga naninirahan sa Bgy. San Manuel at mga karatig-pook. Tandang-tanda ko pa ang munting kapilya ni San Lorenzo na dinatnan ni Rev. Fr. Mario Jose C. Ladra na noo’y bagong paring itinalaga sa lugar na ito taong 2000. Makalipas ang tatlong taon, sa pagpupunyagi ng butihing pari at sa tulong ng maraming nagmagandang-loob, naitayo ang isang maganda at maayos na simbahan. Nabuo at itinatag pagkatapos ang Parokya ng San Lorenzo Ruiz de Manila noong taong 2004 at si Fr. Mar ang naging unang kura paroko nito.


Marami nang Sambuklod ang nagdaan. Maraming panata ang taon-taon ay isinasagawa. Ang mga kabataang sumali noong kauna-unahang Sambuklod ay malalaki na. Ang karamiha’y nagsipagtapos na ng kanilang pag-aaral. Ang iba naman ay may mga trabaho na at may mga sariling pamilya na rin. Hindi na mabilang ang mga kahilingang idinulog, sinambit at natupad sa tulong at panalangin ng mahal naming patron, si San Lorenzo - ang unang santong Pilipino at ang tinaguriang "santong madaling lapitan". Siya ang huwaran ng mga Pilipinong nangingibang-bansa kahit saan mang dako ng mundo. Hindi lingid sa lahat na halos bawat pamilya sa aming parokya ay may mahal sa buhay na nakapangibang-bansa sa tulong at panalangin ng “santong madaling lapitan” na tunay nating kababayan at malapit sa ating mga puso. Higit pa sa sandosenang pasasalamat ang nararapat lamang na ilaan sa Panginoon at sa patrong minamahal!


May kakaibang halaga at kahulugan rin ang ika-labindalawang taon ng Sambuklod. Ito ang huling Sambuklod sa aming parokya ng haligi at punong-abala ng taung-taong masayang pagdiriwang na ito sapagkat sa darating na Nobyembre, 2013 si Fr. Mar Ladra ay maitatalaga na sa ibang parokya. “Paano na kaya ang susunod na Sambuklod?” ang naitanong ko sa aking sarili.


Patuloy ang walang tigil na pagbuhos ng ulan kasabay ang indakan, hiyawan at paligsahan ng mga kalahok sa patio ng simbahan. Sa likod ng kasiyahang ito, di maitatatwang ang mistulang pagluha ng langit ay pakikisa rin sa aming kalungkutan na nadarama sa nalalapit na paglisan ng hindi lamang ng aming mahal na kura paroko na naging gabay sa aming buhay-espiritwal sa loob ng humigit kumulang na labintatlong taon kundi rin ng aming katuwang na kura-paroko na si Rev. Fr. Michael G. Antonio na sa maikling panahong pamamalagi sa aming parokya ay kinakitaan ng tunay na pagmamalasakit at pagmamahal sa kanyang mga parokyano.


Sa isa sa mga maikling pakikipanayam ko kay Fr. Mar, inamin ng butihing pari na, “Di madaling lisanin ang parokyang minahal at pinaglingkuran ko ng mahaba-haba ring panahon.” Wika niya, “Ito ay maihahalintulad sa isang amang iiwan ang kanyang buong pamilya. Ang kaibhan nga lamang, ang isang ama ay maari pang bumalik sa kanyang pamilya. Ang isang kura paroko ay hindi na.” Dagdag pa niya, “Wala na itong balikan.”


Habang ang mga hurado ay nahihirapang magdesisyon kung sino ang tatanghaling nagsipagwagi at kampeon sa taong ito, hindi miminsang nagpakita ng likas na galing sa pag-awit ang naimbitahang Prinsesa ng Kundiman, si Melbelline Anne Caluag. Siya ay naging Kampeon ng Talentadong Pinoy at isa sa ipinagmamalaki ng lalawigan ng Bulacan.


Umugong ang hiyawan at matinding palakpakan nang tawagin na ng TV host at emcee, na si Makata Tawanan ng TV 5 ang Kampeon ng Sambuklod 2013 na walang iba kundi ang Bgy. Sta. Lucia. Tumataginting na P50,000 ang papremyong kanilang iniuwi, tropeo at mga certificates. Mayroon din laang papremyo sa lahat ng nagsilahok.


Wala na ang mga sayawan at hiyawan. Tapos na ang paligsahan. Nagsilisan na ang mga nagsilahok. Wala na isa mang anino sa patio ng simbahan. Ngunit patuloy pa rin ang pagpatak ng manaka-nakang ulan simbolo ng patuloy na mga biyayang dumadaloy sa aming buhay sa gitna ng walang katiyakang kinabukasan.


Mula sa panulat ni: Emily G. Sequeira

Categories: Parish News, Reflections of the Soul

Post a Comment

Oops!

Oops, you forgot something.

Oops!

The words you entered did not match the given text. Please try again.

You must be a member to comment on this page. Sign In or Register

0 Comments